الصوم سر الشباب والصحة.. بس لو صمنا صح

بسم الله الرحمن الرحيم

كل سنة وكل قرّاء "منتدى همس للكل" وكل المسلمين في كل الدنيا بخير وصحة وسعادة، هلّ هلال رمضان أخيراً بعد طول انتظار، الشهر اللي بنستناه كل سنة علشان نفوز ببركته وخيره وثوابه العظيم..

ومع أول أيام شهر رمضان، وإحنا صايمين ومع الحر الشديد أكيد كلنا بنفكّر في الأكل، وبنسأل نفسنا يا ترى السفرة النهارده هيكون عليها إيه؟!

فراخ ولّا بط ولّا ديك رومي؟!!
وأخبار الصواني والمحاشي إيه؟!!
والكنافة والقطايف علشان نحلّي!!

وكل ست بيت واقفة في المطبخ علشان تحضّر سفرة محترمة عليها كل ما لذ وطاب، لكن المشكلة إننا بعد الفطار وخصوصاً في أول يوم صيام ومع الحر الشديد اللي إحنا فيه، بنحس بتعب وخمول وإرهاق وبيكون عندنا مشاكل في الهضم...

وأكيد كلنا بنستغرب ليه بنتعب كده بعد الصيام مع إننا دايماً بنسمع إن الصيام المفروض إن له فوايد صحية كتير، ولكن المشكلة مش في الصيام، المشكلة في العادات الغلط اللي بنعملها واللي مش بتخلينا نقدر نستفيد من الصيام اللي حتى علماء الغرب أكدوا عليها في أبحاثهم وخليتهم ينصحوا بالصيام كعلاج لأمراض كتيرة...

علشان كده فكرت إننا مع أول أيام رمضان نعرف مع بعض إزاي الصيام مفيد جداً لصحتنا، ونعرف كمان إزاي نقدر فعلاً نستفيد من شهر رمضان...

يا ريت نتجنب شُرب المية الساقعة على معدة فاضية

الصوم.. سر الشباب والصحة
الصوم فرصة عظيمة بتساعد الجسم على إنه يتخلّص من كل السموم الموجودة فيه؛ لأنه بيقوّي أجهزة الإخراج في الجسم، وبيخلّيها تتخلّص من السموم بقوة وبسرعة أكبر.

بالإضافة إلى إنه بيحسّن عملية الهضم في جسمنا، وبيخلينا نستفيد أكتر من الأكل اللي بناكله، وكمان بيرجّع الحيوية لخلايا الجسم المختلفة، وبيفتح الذهن، وبيزوّد القدرة على التركيز، مش بس كده ده كمان بيقي الجسم من أمراض كتيرة زي تصلّب الشرايين والنقرس وأمراص القلب.

لكن للأسف مش كلنا بيقدر يحصل على الفوايد العظيمة دي من الصيام؛ لأن معظمنا بيتبع عادات غلط في الأكل، ومنها:

ــ 1 ــ
الأكل بكميات كبيرة

طبعاً السفرة في رمضان بتكون مغرية جداً لأي حد، وبتكون مليانة بأصناف الأكل المختلفة، وعلشان كده بنلاقي نفسنا بناكل بكميات كبيرة جداً على الفطار علشان نقدر ناكل من كل الأصناف الموجودة، لغاية ما معدتنا تتملي ونلاقي جسمنا تقيل ومش قادرين نتحرّك، وخصوصاً إن الكميات دي بتدخل للجسم بعد فترة الصيام الطويلة، فالمعدة بتكون مش جاهزة ولا مستعدة إنها تستقبل الكميات دي من الأكل.

ــ 2 ــ
الإكثار من الحلويات

حلويات رمضان ما حدش بيقدر يقاومها، كنافة وقطايف وجلاش ولقمة القاضي، لكن المشكلة إن تناول الحلويات دي بكميات كبيرة بيزوّد من إحساسنا بالإرهاق والتعب، وبيخلينا نعطش جامد في وقت الصيام.

وكمان بيسبب ارتفاع في ضغط الدم، وبيزوّد نسبة الدهون الموجودة في الجسم، وعلشان كده معظمنا بيخرج من رمضان ووزنه زايد كتير‏.‏

ــ 3 ــ
الأكل المقلي في الزيت

الأكل المقلي بيكون جذاب جداً وسهل في تناوله وخصوصاً للأطفال، لكن الإكثار من الأكلات المقلية بالزيت بتسبب مشاكل صحية كتير، زي ارتفاع نسبة الكوليسترول في الدم.

ــ 4 ــ
شرب المية الساقعة على معدة فاضية

ناس كتير بتحب تفطر على مية ساقعة جداً وبكمية كبيرة وخصوصاً في الحر الشديد اللي إحنا فيه اليومين دول.

لكن العادة دي ممكن تسبب مغص وتقلصات في عضلات المعدة‏ وعسر في الهضم,‏ وكمان بتخلّي الجسم يفقد كمية كبيرة من الأملاح الضرورية له.

ــ 5 ــ
إهمال وجبة السحور

وجبة السحور وجبة مهمة وضرورية جداً في رمضان، لكن ناس كتيرة مش بتهتم بها، وبتركّز بس إنها تاكل أكل دسم وبكميات كبيرة على الفطار، وطبعاً دي طريقة غلط جداً.

وفيه بعض الناس بتتناول وجبة السحور، لكن مكوّناتها بتكون مش صحية؛ لأنها بتحتوي على أكلات مقلية زي الطعمية أو حلويات أو بيلجأوا للوجبات السريعة.

تناول السلطة في أول الفطار بيهيّأ المعدة إنها تستقبل باقي الأكل

إزاي ناكل صح في رمضان؟
علشان جسمنا يستفيد صح من الصيام، لازم نغيّر بعض العادات اللي بنتبعها في الأكل..

وعلشان كده دلوقتي هنعرف بعض النصايح اللي قالوها خبراء التغذية علشان نقدر نحصل على الفايدة الكاملة من الصيام، ولو مشينا عليها هنخرج كلنا من رمضان بصحة كويسة، وهنقدر نعمل العبادات خلال الشهر من غير ما نشعر بتعب أو كسل بعد الأكل...

أولاً
الاهتمام بطبق السلطة

السلطة من الأطباق اللي لازم تكون موجودة على السفرة في أي وقت وخصوصاً مع الصيام؛ لأنها بتزوّد الجسم بكميات كبيرة من الفيتامينات والمعادن والألياف الغذائية.

وكمان تناول طبق السلطة في أول الفطار بيهيّأ المعدة والجسم إنه يستقبل باقي الأكل، وكمان بيقلل من إقبالنا على باقي الأكل اللي بيكون فيه سعرات حرارية عالية.

ثانياً
تقسيم وجبة الفطار على مرتين

أفضل نظام غذائي ممكن نمشي عليه في رمضان إننا نقسّم وجبة الفطار على مرتين؛ يعني على الفطار ناكل طبق السلطة مع الشوربة وأي حاجة خفيفة، وبعد صلاة العشاء والتراويح ناخد وجبة تانية.

ثالثاً
اختيار الطرق الصحية للطهي

معظم ستات البيوت في رمضان بتحب تعمل الأكل المحمّر، لكن خبراء التغذية بينصحوا إنه علشان أكلنا يكون صحي ونحافظ على معدتنا وخصوصاً في رمضان لازم نقلل من تناول الأكل المقلي في الزيت، ونستخدم طرق تانية في الطبخ زي إننا نسلق الأكل أو نحطه في الفرن أو نسوّيه على البخار؛ يعني مثلاً بدل ما نعمل سمك مقلي ممكن نعمله صينية في الفرن، ودي بتكون طعمها لذيذ ومفيدة جداً، ونقدر كمان نشويه أو حتى نعمله مسلوق.

رابعاً
تقليل الملح في الأكل

لازم نحاول على أد ما نقدر إننا نقلل من كمية الملح في أكلنا؛ لأن زيادة كميته في الأكل ممكن تسبب ارتفاع في ضغط الدم، وخلل في توزيع السوائل في الجسم.

خامساً
الاهتمام بتناول منتجات الألبان

لازم نهتم بشرب اللبن جداً سواء مع الفطار أو على السحور، وكمان منتجات الألبان التانية زي الجبنة والزبادي؛ لأن لهم فوايد كتيرة جداً للجسم.

سادساً
الاهتمام بتناول الفاكهة والخضراوات

لازم ناخد بالنا إننا نحصل على كمية كويسة من الخضار الطازة بعد الفطار زي الخس والخيار والجرجير وكمان الفاكهة زي الخوخ والمشمش؛ لأن الخضار والفاكهة الطازة بتمنع الإصابة بالإمساك، وبتمد الجسم بفيتامينات مهمة جداً.

سابعاً
تأخير وجبة السحور

من الأفضل إننا نأخّر وجبة السحور لغاية قبل ميعاد الإمساك زي ما أمرنا رسولنا الكريم صلى الله عليه وسلم؛ لأن ده هيخلينا نحتفظ بطاقة وجبة السحور لباقي اليوم.

ولازم وجبة السحور تكون خفيفة، وتكون بتحتوي على ألياف غذائية زي اللي موجودة في الخضار الطازة، وكمان تكون بتحتوي على البروتين زي اللي موجود في البيض.

وبكده يكون خلص كلامنا النهارده...
وأتمنّى إنكم تستفيدوا من النصايح اللي قولناها النهارده...
وهاستنى تعليقاتكم علشان تقولوا لنا عملتوا بالنصايح دي ولا لأ...

السلام عليكم ورحمة الله وبركاته ،،،

بارك الله فيك أختي همسة على هذا المجهود الرائــع في النصائع الاروع

بسم الله ماشاء الله عليك

يارب يمتعك بموفور الصحة والعافيه

» شهر الصوم
» كيف تعودين ابنك على الصوم ؟
» هل القيء يفسد الصوم ؟
» فوائد الصوم للجسم بالصور
» النية في الصوم - الشيخ د. سعد البريك