كل جرح يداوى غير جرح القريب

كان راي القبيله بالشدايد سوى = غاب شره ونجمه بالدهر مايغيب
وان غدى كل شيخ له طريق وهوى = ما تلاقي لحـقــه بالـقـبـايل طليب
وكان قالوا لراع الراي مالك لوى = ضاع راي الجماعه بالزمان العصيب
وكان ذيب العداوه بالجماعه عـوى = انحدر بـه نصيبه في مثاني قليب
والطبايع دليل القلب باللي حوى = ترشدك قبل تنزل في مسايل شعيب
والزعل يظهر اللي بالضماير طوى = وكل جرح يداوى غير جرح القريب
ومن يجامل عزيز بالسوالف غوى = سجل اسمه بضباط الجـهـاله نقيب
وجمرة الحسد ماله بالخـلايق دوى = صعب تلقى لحساد الخلايق طبيب
لو بغى كتم حقده بالحشى ماقـوى = وخرقة الثوب الابيض ماتخفي لهيب
ماتفيده علاجات العرب لو كوى = ولو سقيته شراب فيه قروة خطيب
وكل قلب من عـروق الرحامه خوى = صار ماله من الرحمن حـظ ونصيب
وكان جذع الغرايس بالشتاوي ذوى = ارتحل لين تسكن في مكان خصيب
ومن نوى الراي يجزم قالـتـه لا نوى = ومن تردد برآيـه فالعزايم تخيب
وراوي الهرج يثبت للعرب ماروى = قبل يدعي ويلقى الناس ماتستجيب

» جرح القريب