إزاي تتعاملي مع الجنس الآخر؟!

بسم الله الرحمن الرحيم

مشكلة التعامل مع الجنس الآخر مشكلة بتعاني منها بنات كتيرة أوي؛ سواء في مجال العمل أو في الجامعة؛ وده لأن في نوعين من البنات:

النوع الأول: بنات بتبعد نهائي عن التعامل مع الجنس الآخر؛ لأنها شايفة إن كلامها مع الجنس الآخر حرام، وده غلط لأنه مش عيب ولا حرام إنك تتعاملي مع زميل لك في العمل أو في الجامعة، طالما إن التعامل ده في الحدود المتعارف عليها والمقبولة اجتماعياً.

النوع الثاني: بنات بتتعامل بشكل مفتوح زيادة عن اللزوم مع الجنس الآخر، وبتكون النتيجة إنها بتتعرّض لمشاكل كثيرة نتيجة الانفتاح في العلاقات مع الجنس الآخر.

وبكده بنلاقي إن الانفتاح والانغلاق زيادة عن اللزوم بينتج عنهم مشاكل كتيرة قوي؛ علشان كده هنتعرّف مع بعض النهارده على مجموعة من القواعد اللي ممكن إنك تحطيها قدامك وأنت بتتعاملي مع زملائك في العمل..


القاعدة الأولى
مظهرك بيعكس شخصيتك



مظهرك مهم جداً؛ لأنه هو اللي بيعكس شخصيتك وبيدي الانطباع عندك لدى زملائك في العمل، وعلى أساسه زملائك هيتعاملوا معاكِ، علشان كده يا ريت إنك تحرصي على ارتداء ملابس محتشمة، وتبعدي نهائياً عن الملابس القصيّرة أو المفتوحة أو الشفافة؛ لأنها هتدي انطباع سيئ عنك.. كمان راعي إن ماكياجك يكون بسيط وبلاش تكتري منه، وابعدي عن الإكسسوارات كبيرة الحجم أو اللي فيها ألعاب كثيرة بتعمل صوت أثناء الحركة، وخليكِ دايماً فاكرة إنك رايحة شغل مش عرض إزياء.


القاعدة الثانية
اتعاملي مع الجميع


اتعاملي مع الجميع... طبعاً اللي هتشوف القاعدة دي هتستغرب أوي، وتقول بينها وبين نفسها: "إزاي أتعامل مع الجميع ده كده أنا هاكون منفتحة أوي"، هاقول لك إن ما فيش أي مشكلة من إنك تتعاملي مع الجميع، بس بشرط إنك تتعاملي معاهم من منطلق الأخوة، يعني ما فيش مانع من كلمة صباح الخير أو مشاركة الموجودين في حديث عام مع مراعاة عدم الانفراد بشخص واحد والتحدّث معه أو تأييد وجهة نظره بشدة بدون داعي... كمان بلاش تدي اهتمام زيادة لشخص على عكس الباقي الزملاء الموجودين في العمل، وخلّي طريقة وأسلوب كلامك مع الكل واحدة.


القاعدة الثالثة
ابعدي عن المجاملات الفردية


ابعدي عن المجاملات الفردية في المناسبات غير المعروفة لباقي الزملاء؛ زي مثلاً إنك تقدّمي هدية بشكل فردي لزميل لك في مناسبة ما خاصة؛ زي عيد ميلاده بدون مشاركة من باقي الزملاء... ومش معنى كلامي ده إنك ما تكونيش اجتماعية وتبعدي عن الناس لا خليكِ اجتماعية واشتركي مع باقي زملائك في إحضار الهدية خصوصاً في المناسبات المعروفة لدى الكل؛ زي مثلاً الزواج أو الإنجاب أو عيد الميلاد... وخدي بالك إنك لما هتجاملي زميل ما، لا بد من مجاملة الآخرين بنفس الطريقة والمستوى حتى لو كان بينك وبينهم مشاكل لتفادي الشبهات، كمان بلاش تتمادي في توجيه الكثير من كلمات الإعجاب لزميل لك في العمل لتفوّقه مثلاً في عمل ما كلف بيه؛ لأن موقف زي ده ممكن إن حد يسمعه ويفسّره غلط.


القاعدة الرابعة
بلاش هزار على الفاضي والمليان


يا ريت إنك تبعدي عن الهزار على الفاضي والمليان مع زملائك في العمل، أو مع زميل بعينه؛ وده لأن الهزار والضحك على الفاضي والمليان ممكن إنه يقلل من شأنك.. ومش معنى كلامي إنك تقعدي مكشرة، لكن اضحكي وهزري بس لما يكون في داعي لكده، ويكون كل الزملاء مشتركين في الهزار ده، وخدي بالك إنك تبعدي نهائي عن موضوع الهزار بالإيد أو الهزار في موضوعات خارجة عن حدود الأدب أو أي هزار يكون فيه كلام ساخر عليكِ أو على حد؛ لأن ده ممكن يكون سبب لرفع التكليف بينك وبين اللي قدامك، ولو لقيتِ حد بيهزر بالطريقة دي اعملي نفسك ولا كأنك سامعة حاجة وإنك وراكِ شغل ومش فاضية للكلام ده.


القاعدة الخامسة
ابعدي عن الأحاديث الخاصة


ما فيش أي داعي إنك تتكلمي مع زميل لك في موضوعات خاصة بيكِ زي ظروفك حياتك الخاصة أو أنه يتكلم معاكِ في ظروف حياته الخاصة بحجة إنك بتستريحي لرأيه؛ لأن النوع ده من الحديث عادة ما بيكون السبب في توطد العلاقة بشكل غير لائق، كمان ممكن إنه الشخص اللي حكيتي له يستغل الكلام ده بشكل يسيء لك أو أنه يعرف نقاط ضعفك وبالتالي يستغلك من خلالها.


القاعدة السادسة
ابعدي عن جلسات النميمة

أحياناً في مجال العمل بتلاقي مجموعة من الزملاء كل مهمتهم هي النميمة على باقي الموجودين، يا ريت إنك تبعدي عن جلسات النميمة دي، وده لأن عادة الموضوعات اللي بيتم الحديث فيها في مثل هذه الجلسات موضوعات لا تصلح للمناقشة، بالاضافة إلى أن وجودك في مثل هذه الجلسات يسيء لك ولشخصيتك، بالإضافة إلى أنك في يوم من الأيام هتلاقي نفسك محور هذه الجلسات.


القاعدة السابعة
اتكلّمي قدام الناس كلها


يا ريت إنك لما تتكلمي مع زميل لك يكون الكلام قدام الناس كلها بعيد عن الأحاديث الجانبية، إلا إذا كانت ظروف العمل هي اللي بتستدعي ده، وتكون الناس كلها عارفة طبيعية علاقة العمل اللي بتجمع بينك وبين هذا الزميل، وده علشان تتقي الشبهات.


القاعدة الثامنة
اتصرّفي بحزم


لو لقيتِ أي تجاوز من أي زميل لك في العمل يبقى اتصرفي بحزم وشدة؛ وده علشان توقفي الشخص المتجاوز عند حده، وخدي بالك إن السكوت أحياناً ممكن يكون سبب في إن الشخص ده يتمادى في تجاوزاته، وبكده بيكون الحزم مهم جداً حتى لو قطعتي أي كلام نهائي مع هذا الشخص.

وبالقواعد دي تقدري إنك تتعاملي وأنت واثقة من نفسك وواثقة إن ما فيش أي حاجة تسيء ليكِ ولشخصيتك.. ويا ريت تبعتي وتقولي لنا على رأيك في الموضوع... وتحكي لنا عن تجاربك في العلاقات مع الجنس الآخر.

سلمت يدك على هذا الطرح الطيب
أثابك الله وجعله فى ميزان حسناتك
كل الود والاحترام